ਤੇਜ਼ ਹਵਾਵਾਂ ਤੋਂ ਬਚਣ ਲਈ ਹੋਰਡਿੰਗ ਪਿੱਛੇ ਲਿਆ ਸਹਾਰਾ ਬਣਿਆ ਮੌਤ ਦਾ ਸਬੱਬ

ਮਹਾਰਾਸ਼ਟਰ ਵਿਚ ਪੁਣੇ ਜ਼ਿਲ੍ਹੇ ਦੇ ਪਿੰਪਰੀ ਚਿੰਕਵਡ ਖੇਤਰ ਵਿਚ ਸੋਮਵਾਰ ਸ਼ਾਮ ਤੇਜ਼ ਹਵਾ ਦੇ ਕਾਰਨ ਲੋਹੇ ਦਾ ਹੋਰਡਿੰਗ ਡਿੱਗਣ ਨਾਲ ਘੱਟੋ-ਘੱਟ 5 ਲੋਕਾਂ ਦੀ ਮੌਤ ਹੋ ਗਈ ਤੇ ਦੋ ਹੋਰ ਜ਼ਖ਼ਮੀ ਹੋ ਗਏ। ਪੁਲਸ ਸੂਤਰਾਂ ਨੇ ਇਹ ਜਾਣਕਾਰੀ ਦਿੱਤੀ।

ਇਹ ਘਟਨਾ ਰਾਵਤ ਕਿਵਲੇ ਖੇਤਰ ਵਿਚ ਮੁੰਬਈ-ਪੁਣੇ ਰਾਜਮਾਰਗ ‘ਤੇ ਸਰਵਿਸ ਰੋਡ ‘ਤੇ ਵਾਪਰੀ। ਪੁਲਸ ਦੇ ਇਕ ਅਧਿਕਾਰੀ ਨੇ ਕਿਹਾ, “ਤੇਜ਼ ਹਵਾ ਦੇ ਕਾਰਨ ਕੁੱਝ ਲੋਕਾਂ ਨੇ ਲੋਹੇ ਦੇ ਹੋਰਡਿੰਗ ਪਿੱਛੇ ਸਹਾਰਾ ਲਿਆ ਸੀ। ਹੋਰਡਿੰਗ ਅਚਾਨਕ ਉਨ੍ਹਾਂ ‘ਤੇ ਡਿੱਗ ਗਿਆ, ਜਿਸ ਨਾਲ 5 ਲੋਕਾਂ ਦੀ ਮੌਤ ਹੋ ਗਈ ਤੇ 2 ਹੋਰ ਜ਼ਖ਼ਮੀ ਹੋ ਗਏ।”

ਉਨ੍ਹਾਂ ਕਿਹਾ ਕਿ 5 ਲਾਸ਼ਾਂ ਬਰਾਮਦ ਕੀਤੀਆਂ ਗਈਆਂ ਹਨ ਤੇ ਇਹ ਪਤਾ ਲਗਾਉਣ ਲਈ ਤਲਾਸ਼ੀ ਮੁਹਿੰਮ ਜਾਰੀ ਹੈ ਕਿ ਹੋਰਡਿੰਗ ਦੇ ਥੱਲੇ ਕੋਈ ਹੋਰ ਤਾਂ ਨਹੀਂ ਫੱਸਿਆ ਹੋਇਆ। ਅਧਿਕਾਰੀ ਨੇ ਕਿਹਾ ਕਿ ਜ਼ਖ਼ਮੀ ਵਿਅਕਤੀਆਂ ਨੂੰ ਹਸਪਤਾਲ ਲਿਜਾਇਆ ਗਿਆ ਹੈ।